| BY | Bongvy | / | 17-05-2019 | / | 515 |
តើធ្វើយ៉ាងដូចម្តេចដើម្បីសម្រេចការងារយ៉ាងជោគជ័យជារៀងរាល់ថ្ងៃ?
តើអ្នកធ្លាប់ដែលសួរខ្លួនឯងថាខ្លួនបានសម្រេចកិច្ចការអ្វីខ្លះក្នុងមួយថ្ងៃៗដែរឬទេ? ឬធ្លាប់ដែលមានអារម្មណ៍ថាអ្នករវល់ពេញមួយថ្ងៃនៅកន្លែងធ្វើការ ប៉ុន្តែអ្នកហាក់ដូចជាមិនបានបញ្ចប់កិច្ចការណាមួយដែលអ្នកបានគ្រោងនឹងធ្វើសោះ?
ប្រសិនបើអ្នកកំពុងសួរខ្លួនឯងបែបនេះ ឬក៏អ្នកតែងតែមានអារម្មណ៍ថាអ្នកត្រូវការពេលវេលាសម្រាក និងពេលវេលាជាមួយគ្រួសារ អត្ថបទនេះនឹងណែនាំអំពីអំពីវិធីសាស្រ្តក្នុងការទទួលបានពេលវេលាសម្រាកពីការងារពី៨ទៅ១០ម៉ោងក្នុង១សប្តាហ៍។
ថ្ងៃនេះ យើងនឹងបង្ហាញអំពីវិធីសាស្ត្រទី១៖ ការការពារពេលវេលារបស់អ្នក។ សប្តាហ៍ក្រោយ យើងនឹងបង្ហាញពីវិធីសាស្ត្រ៣យ៉ាងទៀតដើម្បីបង្កើននូវផលិតភាពរបស់អ្នក។
*ការការពារពេលវេលារបស់អ្នក
អ្នកត្រូវប្រាកដថា អ្នកបានការពារពេលវេលារបស់អ្នក ហើយប្រើប្រាស់វាដូចដែលអ្នកបានគ្រោងទុក ពីព្រោះវាមានសារៈសំខាន់ខ្លាំងណាស់ក្នុងការបង្កើនផលិតភាពរបស់អ្នក។ ដើម្បីអនុវត្តវិធីសាស្ត្រនេះយ៉ាងងាយស្រួលបំផុតគឺ អ្នកត្រូវកំណត់អាទិភាពលើការងាររបស់អ្នក និងធ្វើផែនការការងារសម្រាប់ថ្ងៃនីមួយៗរបស់អ្នក។
សរសេរការងារដែលអ្នកត្រូវធ្វើក្នុងថ្ងៃនីមួយៗ ហើយរៀបចំផែនការងាររបស់អ្នក
តារាងគ្រប់គ្រងការងារ និងអាទិភាពការងារ៖ តារាងទាំងពីរនេះអាចមានឥទ្ធិពលដល់ការផ្លាស់ប្តូរក្នុងជីវិតរបស់អ្នក ពីព្រោះការអនុវត្តបែបនេះជួយឲ្យអ្នកចងចាំនូវកិច្ចការរបស់អ្នក។ ដូច្នេះ អ្នកអាចសម្រេចនូវកិច្ចការដែលអ្នកត្រូវធ្វើប្រចាំថ្ងៃ និងសម្រេចនូវកិច្ចការសំខាន់ៗរបស់អ្នកផងដែរ។ តារាងគ្រប់គ្រងការងារគឺជាការសរសេរការងារដែលអ្នកត្រូវធ្វើ ហើយវាមានសារៈសំខាន់សម្រាប់អ្នកខ្លាំងណាស់។ អ្នកអាចធ្វើតារាងនេះនៅក្នុងសៀវភៅកំណត់ត្រារបស់អ្នក នៅក្នុងកម្មវិធីសរសេរឯកសារក្នុងកុំព្យូរទ័រ ឬក៏ប្រើកម្មវិធីសម្រាប់កត់ត្រាដូចជា Evernote ឬ Trello ឬកម្មវិធីផ្សេងៗទៀតក៏បានដែលអ្នកចង់ប្រើប្រាស់។
អ្នកគួរជ្រើសរើសកិច្ចការអាទិភាព៣ក្នុងចំនោមកិច្ចការប្រចាំថ្ងៃផ្សេងៗទៀត។ របៀបនៃការផ្តល់អាទិភាពលើការងារមាន២យ៉ាងគឺ “សំខាន់ ហើយបន្ទាន់” អាទិភាពទី១ និង “សំខាន់ ហើយមិនសូវបន្ទាន់” អាទិភាពទី២។ ប្រសិនបើក្នុង១ថ្ងៃ អ្នកអាចសម្រេចបានកិច្ចការទាំង៣នោះ វាមានន័យថា អ្នកទទួលបានជោគជ័យក្នុងផែនការរបស់អ្នក។ មូលហេតុដែលអ្នកត្រូវជ្រើសរើសយកកិច្ចការអាទិភាព៣គឺដើម្បីប្រាកដថាអ្នកត្រូវបញ្ចប់កិច្ចការសំខាន់ៗបំផុតក្នុងមួយថ្ងៃៗ ឧទាហរណ៍ ប្រសិនបើអ្នកមានកិច្ចការ១០ដែលអ្នកត្រូវវធ្វើ ប៉ុន្តែអ្នកមិនបានកំណត់អាទិភាពនៃកិច្ចការទាំងនោះទេ អ្នកអាចនឹងមានទំនោរធ្វើកិច្ចការណាដែលងាយស្រួយជាងគេ ប៉ុន្តែមិនមែនជាកិច្ចការសំខាន់ ដូច្នេះវាធ្វើឲ្យអ្នកខកខានក្នុងការសម្រេចកិច្ចការសំខាន់បាន។
២.ធ្វើផែនការការងារ ហើយពិនិត្យឡើងវិញឲ្យបាន១សប្តាហ៍មុន
ជំហានបន្ទាប់គឺអ្នកត្រូវរៀបចំផែនការការងារប្រចាំសប្តាហ៍។ ជាការល្អអ្នកគួរធ្វើវានៅរាល់ថ្ងៃសុក្រ ឬថ្ងៃសៅរ៍ នៅពេលអ្នកបញ្ចប់ការងារប្រចាំសប្តាហ៍ ឬនៅពេលរសៀលថ្ងៃអាទិត្យ ពីព្រោះអ្នកត្រូវធ្វើផែនការឲ្យបានមុនពេលសប្តាហ៍ថ្មីឈានមកដល់។
ក្នុងកំឡុងពេលនេះ អ្នកអាចឆ្លុះបញ្ចាំងសកម្មភាពក្នុងសប្តាហ៍មុនដើម្បីដឹងថាតើនៅសល់កិច្ចការអ្វីខ្លះទៀតដែលអ្នកត្រូវបញ្ចប់ និងរៀបចំផែនការសម្រាប់បញ្ចប់ការងារទាំងនោះនៅក្នុងសប្តាហ៍បន្ទាប់។ ដូច្នេះអ្នកត្រូវធ្វើបច្ចុប្បន្នភាពតារាងគ្រប់គ្រងការងាររបស់អ្នក និងកំណត់អាទិភាពលើការងារក្នុងសប្តាហ៍ថ្មី។
.ប្រើប្រាស់ប្រតិទិន
ជំហានចុងក្រោយមើលទៅហាក់ដូចជាសាមញ្ញ ប៉ុន្តែវាមិនមែនគ្រាន់តែជាប្រើប្រាស់ប្រតិទិនដើម្បីកត់ត្រាកាលវិភាគប្រជុំប៉ុណ្ណោះទេ។ វាគឺជាការការពារពេលវេលារបស់អ្នកសម្រាប់កិច្ចការសំខាន់ៗ។ មនុស្សភាគច្រើនមិនបានគិតអំពីរឿង២យ៉ាងសំខាន់ៗនៅពេលកត់កាលវិភាគនៅក្នុងប្រតិទិន គឺកាលវិភាគសម្រាប់ការងារផ្ទាល់ខ្លួន និងកាលវិភាគសម្រាប់សុខមាលភាពរបស់ខ្លួន។ ការទុកពេលវេលាសម្រាប់ការងារផ្ទាល់ខ្លួនគឺមានសារៈសំខាន់ណាស់សម្រាប់មនុស្សម្នាក់ៗ។ អ្នកត្រូវទុកពេលវេលាសម្រាប់ការងារផ្ទាល់ខ្លួនពី២ទៅ៣ម៉ោង ដូចនេះអ្នកអាចបញ្ចប់ការងារផ្ទាល់ខ្លួនបានដោយជោគជ័យ និងគ្មានការរំខាន។ ដូច្នេះ អ្នកត្រូវប្រាកដថាអ្នកបានកំណត់កាលវិភាគនេះ ហើយបញ្ចូលវាទៅក្នុងប្រតិទិនរបស់អ្នក។ បន្ទាប់មក គឺអ្នកត្រូវទុកពេលវេលាសម្រាប់ថែទាំសុខភាពរបស់អ្នក ដូចជាពេលវេលាសម្រាប់ហាត់ប្រាណ ធ្វើសមាធិ សម្រាកគេងពេលថ្ងៃ ឬធ្វើសកម្មភាពផ្សេងៗដែលជួយដល់សុខភាពអ្នកដើម្បីបង្កើននូវផលិតភាពនិងប្រសិទ្ធិភាពការងាររបស់អ្នក។
ជំហានទាំង៣ដែលបានរៀបរាប់ខាងលើគឺជាមធ្យោបាយដ៏មានប្រសិទ្ធិភាពក្នុងការគ្រប់គ្រងពេលវេលារបស់អ្នក និងជួយបង្កើននូវប្រសិទ្ធិភាពការងារប្រចាំថ្ងៃរបស់អ្នក។ សូមអានអត្ថបទបន្ទាប់ដែលនិយាយអំពីវិធីសាស្ត្រទី២ក្នុងការបង្កើនផលិតភាពការងារ។
|