| BY | Bongvy | / | 13-05-2019 | / | 1517 |
ថ្នាក់ដឹកនាំ មន្ត្រីរាជការ នៃគណៈកម្មាធិការប្រយុទ្ធប្រឆាំងផលិតផលក្លែងក្លាយបានផ្ញើរសារលិខិតថ្វាយព្រះពរ ព្រះបាទសម្តេច ព្រះបរមនាថ នរោត្តម សីហមុនី ក្នុងពិធីបុណ្យចម្រើនព្រះជន្មគម្រប់៦៦ព្រះវស្សា យាងចូល ៦៧ព្រះវស្សា
សូមព្រះបារមី ព្រះមហាស្វេតច្ឆ័ត្រ វត្ថុស័ក្កិសិទ្ធិក្នុងលោកប្រោសប្រទានពរជ័យ សិរីមង្គលថ្វាយ ព្រះករុណា ជាអម្ចាស់ជីវិតតម្កល់លើត្បូង ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា
នៅក្នុងឪកាសអភិលក្ខិតកាលដ៏មហាមង្គលសួស្តីប្រពៃថ្លៃថ្លា ប្រកបដោយសេចក្តីអភិរម្យសោមនស្សរីករាយ នៃពិធីបុណ្យចម្រើនព្រះជន្មគម្រប់៦៦ព្រះវស្សា យាងចូល ៦៧ព្រះវស្សា
ទូលព្រះបង្គំយើងខ្ញុំ តាងនាមថ្នាក់ដឹកនាំ មន្ត្រីរាជការ នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ សូមព្រះបរមរាជានុញ្ញាត អភិវន្ទលំអោនកាយវាចាចិត្ត ក្រាបបង្គុំសម្តែងថ្វាយនូវមនោសញ្ចេតនារីករាយឥតឧបមា ថ្វាយនូវព្រះសព្វសាធុការពរជ័យ បវរសួស្តី សិរីមង្គល វិបុលសុខ មហាប្រសើរ
ប្រកបដោយកត្តញូ កតវេទិតាធម៌ និងព្រះរាជមហាករុណាទិគុណ ចំពោះព្រះបញ្ញាញាណដ៏ឈ្លាសវៃ និងព្រះរាជសកម្មភាពដ៏ឧត្តុង្គឧត្តមថ្លៃថ្លា ប្រកបដោយគុណធម៌ព្រះមនុស្សធម៌ចំពោះប្រទេសជាតិ និងប្រជានុរាស្ត្ររបស់ព្រះអង្គ ឆ្ពោះទៅកាន់ភាពថ្កុំថ្កើង រុងរឿង ។
ទូលព្រះបង្គំជាខ្ញុំទាំងអស់គ្នា សូមព្រះបរមរាជានុញ្ញាតលើកហត្ថប្រណម្យបួងសួងដល់វត្ថុស័ក្កិសិទ្ធិទាំងអស់ក្នុងលោក គុណបុណ្យព្រះរតនត្រ័យកែវទាំងបី ទេវតាថែរក្សាព្រះមហាស្វេតច្ឆត្រ បុណ្យបារមីនៃព្រះដួងវិញ្ញាក្ខន្ធអតិតព្រះមហាក្សត្រខ្មែរគ្រប់ព្រះអង្គ និងទេវតាឆ្នាំថ្មី សូមតាមជួយថែរក្សាអភិបាលប្រោសព្រំនូវព្រះសព្ទសាធុការពរជ័យគ្រប់ប្រការ សូមព្រះករុណា ជាអម្ចាស់ជីវិតលេីត្បូង និងសម្តេចព្រះមហាក្សត្រី នរោត្តម មុនីនាថ សីហនុ ព្រះវរាជមាតាជាតិខ្មែរ ទ្រង់គង់ប្រថាប់ជាម្លប់ដ៏ត្រជាក់ត្រជុំ ចម្រើនរុងរឿងដល់ប្រជានុរាស្ត្ររបស់ព្រះអង្គ និងសូមប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ ជាភិយេ្យាភាពតរៀងទៅ ។
|