DBT News

Heach

18-11-2025

ឧត្តមក្រុមប្រឹក្សានៃអង្គចៅក្រម បានបើកសម័យប្រជុំលើកទី៣៩ នៅក្នុងព្រះបរមរាជវាំង ក្រោមព្រះរាជាធិបតីភាពដ៏ខ្ពង់ខ្ពស់បំផុត ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ព្រះប្រធានឧត្តមក្រុមប្រឹក្សានៃអង្គចៅក្រម។

ភ្នំពេញ ៖ នៅថ្ងៃទី១៧ ខែវិច្ឆិកា ឆ្នាំ២០២៥ ឧត្តមក្រុមប្រឹក្សានៃអង្គចៅក្រម បានបើកសម័យប្រជុំលើកទី៣៩ នៅក្នុងព្រះបរមរាជវាំង ក្រោមព្រះរាជាធិបតីភាពដ៏ខ្ពង់ខ្ពស់បំផុត ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ព្រះប្រធានឧត្តមក្រុមប្រឹក្សានៃអង្គចៅក្រម ដើម្បីពិនិត្យសម្រេច និងពិគ្រោះយោបល់ លើរបៀបវារៈចំនួន១០ ដោយទទួលបាននូវលទ្ធផល ដូចខាងក្រោម ៖

របៀបវារៈទី១ ៖ ដាក់វិន័យពាក់ព័ន្ធករណីចៅក្រមចំនួន ២២រូប ៖ -ទណ្ឌកម្មខាងវិន័យថ្នាក់ទី១ មានចំនួន ១៣ រូប -ទណ្ឌកម្មខាងវិន័យថ្នាក់ទី២ មានចំនួន ៩ រូប របៀបវារៈទី២ ៖ ដាក់វិន័យពាក់ព័ន្ធនឹងព្រះរាជអាជ្ញារងចំនួន ៣រូប ៖ -ទណ្ឌកម្មខាងវិន័យថ្នាក់ទី១ មានចំនួន ២ រូប -ទណ្ឌកម្មខាងវិន័យថ្នាក់ទី២ មានចំនួន ១ រូប របៀបវារៈទី៣ សម្រេចយល់ព្រមលើការស្នើផ្ទេរភារកិច្ច និងតែងតាំងមុខតំណែង ប្រធាន អនុប្រធាន និងចៅក្រម នៃសាលាជម្រះក្តីមួយចំនួនដែលដល់វេនត្រូវធ្វើការផ្លាស់ប្តូរ និងដោយយោងទៅតាមតម្រូវការជាក់ស្តែងសរុបមានចំនួន ៨៩រូប ក្នុងនោះរួមមាន ថ្នាក់តុលាការកំពូលចំនួន ២រូប,ថ្នាក់សាលាឧទ្ធរណ៍ចំនួន ១៧រូប និងថ្នាក់សាលាដំបូងរាជធានី-ខេត្តមានចំនួន ៧០រូប ។ របៀបវារៈទី៤៖ យល់ព្រមលើសំណើផ្ទេរភារកិច្ច និងតែងតាំងមុខតំណែង អគ្គព្រះរាជអាជ្ញារង ព្រះរាជអាជ្ញា និងព្រះរាជអាជ្ញារង សរុបមានចំនួន ៥៦រូប ក្នុងនោះ រួមមាន នៅថ្នាក់មហាអយ្យការអមតុលាការកំពូលចំនួន ៣រូប និងនៅថ្នាក់អយ្យការអមសាលាដំបូងរាជធានី-ខេត្តចំនួន ៥៣រូប។ របៀបវារៈទី៥៖ យល់ព្រមចំពោះសំណើសុំដំឡើងថ្នាក់ ឋានន្តរស័ក្តិ តាមវេនអតីតភាព តាមកម្រិតសញ្ញាបត្រ ចំពោះចៅក្រម និងព្រះរាជអាជ្ញា សម្រាប់ឆ្នាំ២០២៥ សរុបទាំងអស់មានចំនួន ១៧០រូប ក្នុងនោះមានចំនួន ១២៩រូប ត្រូវស្នើតាមវេនអតីតភាព និងចំនួន ៤១រូប ត្រូវស្នើតាមកម្រិតសញ្ញាបត្រ។ របៀបវារៈទី៦៖ សម្រេចយល់ព្រមអនុញ្ញាតឱ្យលោកស្រី អ៊ុំ ម៉ាណូកា ចៅក្រមសាលា ដំបូងខេត្តកណ្តាល លាឈប់ពីមុខតំណែង និងក្របខណ្ឌចៅក្រម គិតចាប់ពីថ្ងៃទី៣០ ខែវិច្ឆិកា ឆ្នាំ២០២៥ តាមសំណើរបស់សាមីខ្លួន។ របៀបវារៈទី៧៖ សម្រេចយល់ព្រមអនុញ្ញាត ឱ្យលោកស្រី រស់ បូផាណា ចៅក្រមសាលាឧទ្ធរណ៍ត្បូងឃ្មុំ បានឈប់សម្រាកពីការងារ រយៈពេល ២ (ពីរ)ឆ្នាំ បន្តទៀត ដោយរក្សាក្របខណ្ឌ និងគ្មានបៀវត្ស ។ របៀបវារៈទី៨៖ ពិគ្រោះយោបល់ លើសំណើសុំដាក់ឱ្យនៅទំនេរគ្មានបៀវត្សរយៈពេល ២ឆ្នាំ របស់ ព្រះរាជអាជ្ញារង ១រូប នៃអយ្យការអមសាលាដំបូងខេត្តមណ្ឌលគិរី៖ សម្រាប់សម័យប្រជុំលើកនេះ អង្គប្រជុំបាន ផ្តល់យោបល់យល់ព្រមអនុញ្ញាតឱ្យលោក ហាក់ សៀកលីម ព្រះរាជអាជ្ញារងនៃអយ្យការអមសាលាដំបូងខេត្ត មណ្ឌលគិរី បានឈប់សម្រាកដោយគ្មានបៀវត្សរយៈពេល ២ (ពីរ)ឆ្នាំ។ របៀបវារៈទី៩៖ ពិគ្រោះយោបល់ លើសំណើសុំលាឈប់ពីមុខតំណែង និងក្របខណ្ឌព្រះរាជអាជ្ញា របស់ព្រះរាជអាជ្ញា ១រូប នៅក្រសួងយុត្តិធម៌ តាមសំណើរបស់សាមីខ្លួន៖ សម្រាប់សម័យប្រជុំលើកនេះ អង្គប្រជុំបាន ផ្តល់យោបល់យល់ព្រមអនុញ្ញាតឱ្យលោកស្រី ទុត រែនណា ព្រះរាជអាជ្ញានៅក្រសួងយុត្តិធម៌ លាឈប់ពីមុខតំណែង និងក្របខណ្ឌព្រះរាជអាជ្ញា ដោយគិតចាប់ពីថ្ងៃទី៣០ ខែវិច្ឆិកា ឆ្នាំ២០២៥ តាមសំណើរបស់សាមីខ្លួន។ របៀបវារៈទី១០៖ បញ្ហាផ្សេងៗ៖ ចំពោះរបៀបវារៈនេះ អង្គប្រជុំមិនមានបញ្ហាអ្វីលើកឡើងទេ។