មួយវិញទៀត ក្នុងករណីដែលសត្វឆ្កែខាំ ទោះមានរយៈពេលយូរឆ្នាំមកហើយក្ដី ប្រសិនមានជំងឺរើឡើងវិញនោះ ម្ចាស់សត្វឆ្កែ ក៏នៅតែមានកាតព្វកិច្ចសងទៅកាន់ជនរងគ្រោះនោះដដែល។ លោកមេធាវី ក៏បានបន្ថែមទៀតថា ក្នុងករណីមួយចំនួនអាចបន្ធូរបន្ថយការទទួលខុសត្រូវពីម្ចាស់សត្វចិញ្ចឹមនោះបានផងដែល គឺនៅពេលគ្រោះថ្នាក់ដែលបង្កឡើងដោយមានការចូលរួមពីជនរងគ្រោះ ដូចជាជនរងគ្រោះបានទៅប្រឡែងលែង ឬយកអ្វីទៅចាក់ធ្វើឱ្យសត្វឆ្កែនោះភ្ញាក់ជាដើម។ ប៉ុន្តែប្រសិនជាជនរងគ្រោះនោះ បានធ្វើការផ្លោះរបងផ្ទះរបស់គេ ហើយត្រូវសត្វឆ្កែខាំនោះ មិនមែនជាទំនួលខុសត្រូវរបស់ម្ចាស់សត្វឆ្កែនោះឡើយ។